بعد 3 سنين حب وسنتين خطوبة وقبل فرحي بشهر تقريبا خطيبي أختفى

ومجرد ما قعدنا في أوضة الكنب لقيت الحجة سليمة جايه بتتعكز على عكاز ها لغاية ما قعدت على طرف الكنبه اللي أنا قاعدة عليها وقالت وهي باصه لقدام _قربي يابنتي ناحيتي

فقربت منها لغاية مابقي بيني وبينها مافيش شبر واحد فمدت أيدها تحسس جنبها لغاية ما مسكت إيدي وقالت لي_إحكي يا صبيه كل اللي شفتيه ليلة إمبارح..

فبدأت أحكيلها اللي شفته وإحساسي من وقتها بإن في حد بيراقبني خاصة إن إحساسي دا زاد من وقت ما دخلت عندها

فكانت بتسمع وهي بتهز راسها لغاية ما خلصت كلامي ففضلت تدندن بترانيم غريبة وهي باصه للسقف وبتطوح راسها يمين وشمال وبعدها قالت_خطيبك م١ت خلاص يا صبية،،م١ت مغدور وروحه نافره وهايمه حواليكي وعايزه تحضر في أي جسد من تاني

ساعتها كان كلامها عن مoت أحمد عامل زي رصاصة الرحمة بالنسبة لي،، واللي جات عشان ترحمني وتأكد كل اللي كان جوايا لكن الغريب إن كان مرتبط بكلامها علامة استفهام جديدة 

فسألتها وانا نفسي مكتوم ونفسي أعيط ومش قادرة=يعني إيه يا حجه؟؟

فرجعت بصت قدامها _زي تناسخ الروح كده يا صبية،، عمرك ما سمعتي عنه

=لأ سمعت

فحطت أيدها على كتفي وقالت_ هو بقا روحه حايمه حواليكي من ساعة ما وصلك في الجلسة وماعدش عايز يسيبك لانه متعلق بيكي ومنتظر إنه يحضر في جسد يكون من خلاله قريب منك،، وساعتها ممكن لما يرجع ينتقم من اللي غدروا بيه..لكن هو تعلقه الأول بيكي أنتي،،

=طب وهو دا ممكن يحصل يا حجة سليمه؟؟

_بتسألي عشان نفسك يحصل ولا بتسألي للعلم بالشيء؟؟

=بسأل للعلم بالشيء

_منين ما هيحضر الجسد اللي ينفع يسكن جواه ويبقى جنبك،، هيبان ينفع ولا ماينفعش والمكتوب على الجبين لازم تشوفه العين يا صبية

=طب ولو مش عايزاه يعمل كده وعايزة أقفل الصفحة دي وانساها واعيش حياة طبيعية

_ياريت كان ينفع يا صبية،، ما انتي يا بنتي اللي حضرّتيه،، وبعدين مش دا خطيبك اللي كنتي مستعدة تعملي أي حاجة عشان يرجع،، وأديكي عملتي وعملك نفذ ورجع،،، ومش بإيدك تحددي رجعته على هواكي